ئاستی ئاوی بەنداوەکانی هەرێم بە شێوەیەکی پێوانەیی بەرز دەبێتەوە.
بەڕێوەبەرایەتی گشتی بەنداو و کۆگاکانی ئاو، سەر بە وەزارەتی کشتوکاڵ و سەرچاوەکانی ئاو، ڕاپۆرتی ٢٤ کاتژمێری ڕابردووی سەبارەت بە دۆخی بەنداوەکان بڵاوکردەوە، کە تێیدا ئاماژە بە زیادبوونێکی بەرچاو لە داهاتی ئاو دەکات.
داتاکانی کۆگاکردنی ئاو لە ٢٤ کاتژمێردا:
بەنداوەکانی دوکان و دەربەندیخان: بڕی ٢٤٢ ملیۆن مەتر سێجا ئاویان تێهاتووە.
ئاستی ئاوی بەنداوی دوکان ٨٣ سم بەرزبووەتەوە.
ئاستی ئاوی بەنداوی دەربەندیخان ٣٠ سم بەرزبووەتەوە.
بەنداوی دهۆک: داهاتی ئاو ٢.٥ ملیۆن مەتر سێجا بووە و ئاستی ئاوەکە ١ مەتر بەرزبووەتەوە.
بەنداوی گۆمەسپان: داهاتی ئاو نیو ملیۆن مەتر سێجا بووە.
بەنداوە بچووک و ناوەندەکان: زۆربەیان گەیشتوونەتە خاڵی پڕبوون.
وەزارەتی کشتوکاڵ ڕایگەیاند کە بەهۆی زیادبوونی داهاتی ئاو، ئەمڕۆ بڕی بەردانەوەی ئاو لە بەنداوی دەربەندیخان زیاد دەکرێت. هەربۆیە جەخت لەم خاڵانە دەکرێتەوە:
دوورکەوتنەوە لە ڕووباری سیروان و کەناراوەکانی خوارووی بەنداوەکان.
پاراستنی گیان و ماڵ و سامانی هاووڵاتیان و نزیک نەبوونەوە لەو ناوچانەی ئەگەری لافاو یان بەرزبوونەوەی ئاویان لێ دەکرێت.
بەڕێوەبەرایەتی گشتی بەنداوەکان دڵنیایی دەداتە هاووڵاتیان کە “پلانی کۆگاکردن و بەردانەوەی ئاو بە شێوەیەکی زانستیانە و سەرکەوتووانە بەڕێوەدەچێت” و تیمەکان لە ئامادەباشیدان بۆ کۆنترۆڵکردنی دۆخەکە.