کەشناسێکی کورد ئاشکرای دەکات، کە سبەینێ وەرزی گەرمی دوایین رۆژەکانی خۆی بەڕێدەکات و دواتر کەشێکی فێنک باڵ بەسەر ناوچەکە دەکێشێت.
ئاراس جەبار، شارەزای کەشناسی بڵاویکردەوە، سبەینێ یەکشەممە، لەئەنجامی کاریگەری بەردەوامی ئەو بەرزەپاڵەپەستۆی لەسەر بەرگەهەوای ناوچەکە جێگیربووە پلەکانی گەرما بەڕاورد بە ئەمڕۆ بەرێژەی 1 بۆ 2 پلە بەرزتر دەبێتەوە و کەشەکە بەراورد بە ئەمڕۆ گەرمتر دەبێت لەگەڵ بەردەوامی کەشوهەوای سارد و باراناوی لەناوچەکانی سنووری دەریای ناوەراست و باشوری ئەوروپا.
ئەوەشی وتووە، لە دوو سبەی دووشەممەوە، بۆ رۆژانی دواتر کاریگەری ئەو بەرزە پاڵەپەستۆیە هێدی هێدی لاواز دەبێت و پلەکانی گەرما کەمێک نزمدەبنەوە.
باسی لەوەشکردووە، دوای ئەوە پێشبینی دەکرێت لە رۆژی پێنجشەممە بەدواوە 9/10/2025 کاریگەری ئەو نزمەپاڵەپەستۆیەی لەکاتی ئێستا لەوڵاتانی ئەوروپا کەشێکی سارد و باراناوی دروستکردوە بەرەو ناوچەکانی سووریا و عێراق و هەرێمی کوردستان جوڵە بکات و بارستە هەوایەکی فێنک لەگەڵ خۆیدا دەهێنێتە ناوچەکەوە و پلەکانی گەرما بەرێژەیەکی زۆر نزمدەبنەوە، بەڵام ئەگەری بارانبارینی لێناکرێت بارستە هەواکە بەگەیشتنی بەناوچەکە وشک دەبێت.