شەپۆلێکی توندی هەورەبروسکە و بارانی بەخوڕ هەرێم دەگرێتەوە

هۆشداریی کەشناسی؛ شەپۆلێکی توندی هەورەبروسکە و بارانی بەخوڕ هەرێم دەگرێتەوە

ئاراس جەبار، شارەزای کەشناسی، نوێترین پێشبینییەکانی بۆ شەپۆلێکی نوێی بارانبارین ڕاگەیاند، کە بڕیارە لە سبەی سێشەممەوە ڕوو لە ناوچە جیاجیاکانی هەرێمی کوردستان بکات و ببێتە هۆی دابەزینی پلەکانی گەرما.

بەپێی پێشبینییەکان، لە دوانیوەڕۆی سبەی سێشەممە (٢٤/٣/٢٠٢٦)، شەپۆلێکی هەورەبروسکە، بارانی بەخوڕ و تەرزە ناوچەکانی سنووری گەرمیان، کەرکوک، سلێمانی و هەڵەبجە دەگرێتەوە، کە هاوکات دەبێت لەگەڵ دابەزینی پلەکانی گەرما بە ڕێژەی ٢ بۆ ٣ پلە.

بۆ ڕۆژی چوارشەممە، مەودای بارانبارینەکە فراوانتر دەبێت و بە شێوەی پچڕپچڕ پارێزگاکانی دهۆک، هەولێر و ئیدارەکانی سۆران و ڕاپەڕین دەگرێتەوە. شارەزاکەی کەشناسی ئاماژەی بەوەش کردووە کە کاریگەریی ئەم شەپۆلە لە ئێوارەی ڕۆژی چوارشەممەدا بەرەو لاوازی دەچێت.

بڕی بارانی پێشبینیکراو لەماوەی هەردوو رۆژی سێشەممە و چوارشەممە:

سنووری پارێزگای سلێمانی 30 – 50 ملم

سنووری پارێزگای هەڵەبجە 20 – 30 ملم

سنووری پارێزگای کەرکوک 20 – 30 ملم

سنووری ئیدارەی گەرمیان 30 – 40 ملم

سنووری پارێزگای هەولێر 10 – 20 ملم

سنووری پارێزگای دهۆک 5 – 10 ملم

سنووری ئیدارەی سۆران و راپەرین 15 – 25 ملم