سەرۆکی دەستەی ناوچە کوردستانییەکان و کونسوڵی گشتی بەریتانیا لە هەرێمی کوردستان کۆبوونەوە و دەڵێت: کێشەکانمان لەگەڵ حکومەتی فیدراڵ زۆرن و حکومەتی فیدراڵ زۆر پابەند نییە بە جێبەجێکردنی ماددە دەستوورییەکان.
ئەمڕۆ دوو شەممە ٢٢ی ئەیلولی ٢٠٢٥ ، فەهمی بورهان، سەرۆکی دەستەی گشتی ناوچە کوردستانییەکانی دەرەوەی ئیدارەی هەرێم پێشوازی لە ئەندرۆ بیزلی، کونسوڵی گشتی بەریتانیا لە هەرێمی کوردستان و شاندێکی یاوەری کرد.
بەپێی ڕاگەیەنراوی دەستەی گشتی ناوچە کوردستانییەکانی دەرەوەی ئیدارەی هەرێم ، سەرۆکی دەستە ، باسی لە کار و چالاکییەکانی دەستە بۆ ئادەبووان کرد، کە چۆن لە چوارچێوەی دەستووری عێڕاقی کاردەکەن لە ناوچە کوردستانییەکان. دواتر گفتوگۆ دەربارەی ماددەی ١٤٠ ی دەستور کرا، کە تاکە ڕێگەیە بۆ چارەسەرکردنی کێشەکانی ئەم ناوچەیەیە، هەروەها تیشک خرایەسەر ئاستەنگەکانی بەردەم جێبەجێکردنی ئەم ماددە دەستوورییە .
فەهمی بورهان وتی، “کێشەکانمان لەگەڵ حکومەتی فیدراڵ زۆرن، بەڵام حکومەتی فیدراڵ زۆر پابەند نییە بە جێبەجێکردنی ماددە دەستوورییەکان، کێشەی زەوی و زاری جووتیاران و کێشەی زمان و کێشەی پێکەوەژیان ئەمانە کێشەگەلێکن دەکرێت لە چوارچێوەی دەستووری هەمیشەیی عێڕاق چارەسەر بکرێن گەر هەوڵی جدی هەبێت لەلایەن حکومەتی عێڕاق”.
لای خۆیەوە کونسوڵی بەریتانیا ، دوای گفتوگۆ لەسەر کۆمەڵێک بابەتی گرنگی تایبەت بە ناوچە کوردستانییەکان، دووپاتی لە گرنگی و بەردەوامی پەیوەندییەکانی کونسوڵخانەکە لەگەڵ دەستە کردەوە بەمەبەستی کاری پێکەوەیی هەوڵدانی بەردەوام تا بتوانن بەشداربن لە چارەسەرکردنی و پشتیوانی خۆشیان لە چوارچێوەی دەستوری عێراق نیشاندا.