جێگری سەرۆك وەزیرانی هەرێم داوا لە هاووڵاتیان دەكات بچن بۆ سەر سندوقەكانی دەنگدان و دەڵێت: خەڵك ئەگەر بە ویژدانەوە هەڵسەنگادن بكات دەزانن كێ كاریگەرە لە بەغدا و كێ تەماشاكارە لە بەغدا.
قوباد تاڵەبانی، جێگری سەرۆك وەزیرانی هەرێم لە لێدوانێكی بۆ میدیاكان وتی، “هیوادارین ئەم بانگەشەیە هێمنانەبێت و بانگەشەیەك بێت خەڵك تێبگات، كە بۆچی دەنگ بدات؟ و بۆچی گرنگە دەنگ بە كام لایەن بدات؟
وتیشی، “خەڵك ئەگەر بە ویژدانەوە هەڵسەنگادن بكات دەزانن كێ كاریگەرە لە بەغدا و كێ تەماشاكارە لە بەغدا”.
ڕاشیگەیاند، ڕاستە ئەمڕۆ یادی كۆچی دوایی مام جەلالە، بەڵام مام جەلال هەر هی من نەبووە وەك باوكێك، بەڵكو مامی گەلێك و باوكی شۆڕشێك بووە، بۆیە لەژیانی سیاسی و ئاساییمان دەبێت بیر لە ڕێباز و بەرنامەكانی بكەینەوە، كە چۆن ژیاوە و خەبات و خزمەتی كردووە و چۆن هەوڵێ داوە پردی پەیوەندی بێت لەنێوان لایەنە ناكۆكەكان.
جەختیشی كردەوە، ئەگەر چارەكێكی ئەوەی مام جەلال كردوویەتی ئێمە بە كۆمەڵ و پێكەوە ئەنجامی بدەین، ئەوا زۆربەی كێشەكان چارەسەر دەبن.
ئاماژەی بەوەشدا، هیوادارین ئەم بانگەشەیە هێمنانەبێت.
لە 11-11-2025 هەڵبژاردن بۆ خوولی شەشەمی پەرلەمانی عێراق بە هەرێمی كوردستانەوە دەستپێدەكات و لە ئەمڕۆوە هەینی 3-10-2025 بانگەشەی حزب و كاندیدەكان دەستی پێكردووە.