لیندسی گراهام، سیناتۆر ئەمریکی، دەڵێت: جووڵەیەکی جددی لە کۆنگرێس دەکەین بۆ پاراستنی کورد لە هێرشەکان و دەڵێت: ئەمریکا پێویستی بە کورد بووە و قەرزە شایستەکە بۆ ئەوان بدات.
لیندسی گراهام، سیناتۆر لە پارتی کۆمارییەکان، ڕایگەیاند ” کاتی دانەوەی قەرزە بەو کوردانەی کە جیهانیان لە داعش پاراست، سیاسەتی ئەمریکا بەرامبەریان گۆڕانکارییەکی گەورە بەخۆیەوە دەبینێت و کاتی ئەوە هاتووە پاداشتی گەلی کورد بدرێتەوە کە قوربانییەکی زۆریان لە شەڕی دژی ڕێکخراوی داعش دا”.
وتیشی: “ئێستا هەموو شتێک گۆڕاوە، تەنها چاوەڕوان بن بۆ ئەوەی ببینن چی ڕوودەدات، ویلایەتە یەکگرتووەکان و جیهان پێویستیان بە کورد بوو و ئەوان لە سەختترین بارودۆخدا لە پاڵمان وەستان، ئێستاش نۆرەی ئێمەیە لە پاڵیان بوەستین و قەرزە شایستەکە بدەینەوە”.
بە پێی زانیارییەکانی ئەو سیناتۆرە، ئێستا کۆنگرێس ئامادەکاری دەکات بۆ بەکارهێنانی “کارتی گوشاری بەهێز لەپێناو پاراستنی کورد”.
وتیشی کە “بابەتەکە لە ڕەهەندی سیاسی تێدەپەڕێت و دەبێتە هەڵوێستێکی ئەخلاقی و وەفایەک بۆ خوێنی شەهیدانی کورد، کە لە ڕوبەڕوبوونەوەی تیرۆردا بەرگرییان لە جیهان کرد”.