لە عێراق بەهۆی کڕین و فرۆشتنی کارتی دەنگدان چەندین کەس دەستگیرکراون
فەرماندەی ئۆپەراسیۆنە هاوبەشەکانی عێراق رایگەیاند، چەندین کەسیان بەتۆمەتی کڕین و فرۆشتنی کارتی دەنگدەران دەستگیرکردووە، هاوکات ئەو کەسانەشی كە بانگەشەی هەڵبژاردن دەکەنە ئامانج دەستگیر دەکات.
لیوا قەیس محەمەداوی، جێگری فەرماندەی ئۆپەراسیۆنەکان و سەرۆکی لیژنەی باڵای ئاسایش بۆ هەڵبژاردنی پەرلەمانی 2025، لە لێدوانێکی رۆژنامەوانیدا رایگەیاند: لە چەند رۆژی رابردوودا هێزە ئەمنییەکانی عێراق، ژمارەیەک لەو كەسانەیان دەستگيرکرد کە کرین و فڕۆشتنیان بەکارتی دەنگدەرانەوە کردووە.
محەمەداوی، ئاماژەی بەوەشکرد، لەسەرەتای دەستپێکردنی بانگەشەی هەڵبژاردنەوە، چەندین کەسیان بەتۆمەتی هێرشکردنە سەر کەمپەین و بارەگاکانی بانگەشەی هەڵبژاردن دەستگیرکردووە.
ئەمە لە کاتێکدایە کە میلیشیاکانی عێراق سەدان ملیۆن دۆلاریان لە کڕینی کارتی دەنگدان خەرج کردووە و هیچ کەس و لایەنێکی عێراقیش ناتوانێت بەرەنگاریان ببێتەوە، ئەوانەشی کە دەستگیرکراون بۆ شاردنەوەی راستییەکانە گوایە حکومەت لێپرسینەوە لە کڕین و فرۆشتنی کارتی دەنگدان دەکات.