میدیای پارتی بڵاویکردەوە کە پارتی و یەکێتی لەسەر ئاستی باڵا دەربارەی پێکهێنانی کابینەی نوێی حکومەتی هەرێمی کوردستان کۆدەبنەوە.
کەناڵی ڕووداو بە ناوی “سەرچاوەیەک لە کۆمیتەی ناوەندیی پارتی دیموکراتی کوردستان”ەوە بڵاویکردەوە، ئەمڕۆ سێشەممە، پارتی و یەکێتی لە ئاستی باڵا کۆدەبنەوە و لەبارەی پێکهێنانی کابینەی دەیەمی حکومەت گفتوگۆ دەکەن.
ئەوەشی خستەڕوو کە لە کۆبوونەوەکەدا هەریەک لە مەسعود بارزانی و بافڵ تاڵەبانی و جێگرانیان بەشدار دەبن.
هەر ئەمڕۆ دەرباز کۆسرەت رەسوڵ، ئەندامی مەکتەبی سیاسیی یەکێتی لە لێدوانێکدا بۆ ڕۆژنامەنووسان ڕایگەیاند، لە چەند ڕۆژی داهاتوودا هەواڵی خۆشیان دەربارەی کۆبوونەوەی پارتی و یەکێتی دەبێت.
وتیشی: “لێکتێگەیشتنی باش هەیە، ئومێد دەکەین لە داهاتوویەکی زۆر نزیکدا لەسەر ئەو خاڵانە رێکبکەوین کە هێشتا ماون.”
لەبارەی کاراکردنی پەرلەمانیش دەرباز کۆسرەت ڕەسوڵ وتی: “نازانم پەرلەمان ئەم مانگە کۆدەبێتەوە یان نا، بەڵام ئومێدەوارین زوو کۆببێتەوە”.