نوێنەرە تایبەتەکەی سەرۆکی ئەمریکا، ڕێککەوتنی بەڕێوەبردنی ئاو لەنێوان عێراق و تورکیا بە گرنگ بۆ بژێوی ژیانی ملیۆنان عێراقی وەسف دەکات.
مارک ساڤایا، نوێنەری تایبەتی دۆناڵد ترەمپ بۆ کاروباری عێراق خۆشحاڵی خۆی بۆ ڕێککەوتنی بەڕێوەبردنی ئاو لەنێوان عێراق و تورکیا نیشان دا و پشتگیری وڵاتەکەشی بۆ عێراق دووپات کردەوە.
ساڤایا لەبارەی ڕێککەوتنی بەڕێوەبردنی ئاو لەنێوان عێراق و تورکیا لەبارەی پرسی ئاو، ڕاگەیاندراوێکی بە هەر سێ زمانی کوردی، عەرەبی و ئینگلیزی لە هەژماری خۆی لە پلاتفۆڕمی کۆمەڵایەتی ئێکس بڵاو کردەوە.
مارک ساڤایا ڕایگەیاند، “پیرۆزە لە هەردوو گهلى کۆماری عێراق و کۆماری تورکیا. دەستخۆشی لە حکومەتی عێراق دەکەم و ئەو ڕێککەوتنە بەرز دەنرخێنم کە لەنێوان کۆماری عێراق و کۆماری تورکیادا واژوو کراوە بۆ چارەسەرکردنی کێشە بەردەوامەکانی بەڕێوەبردنی ئاو لەنێوان هەردوو وڵاتدا”.
نوێنەری ترەمپ بۆ کاروباری عێراق وێڕای بە گرنگ زانینی ئەم ڕێککەوتنە بۆ بژێوی دانیشتووانی عێراق، ڕایگەیاندووە: “ئەم ڕێککەوتنە هەنگاوێکی بەرچاوە بۆ بەرزکردنەوەی هاوکارییەکانی ناوچەکە و دەستەبەرکردنی دەستڕاگەیشتنێکی بەردەوام بە سەرچاوە ئاوییە گرنگەکان کە گرنگن بۆ بژێوی ژیانی ملیۆنان عێراقی ئهوانهى بەهۆی وشکەساڵی و کەميی ئاوەوە زیانیان بەرکەوتووە”.
لە کۆتایی پەیامەکەیدا، نوێنەری تایبەتی دۆناڵد ترەمپ بۆ کاروباری عێراق مارک ساڤایا پابەندی و پشتگیری وڵاتەکەی بۆ عێراق لە لەپێناو سەقامگیريی زیاتر و خۆشگوزەرانی و ژینگەیەکی بەردەوامدا دووپات کردووەتەوە.
جێی ئاماژەیە ڕێککەوتنی بەڕێوەبردنی ئاو لەنێوان عێراق و تورکیا ڕۆژی یەکشەممە لەمیانی سەردانێکی وەزیری دەرەوەی تورکیا هاکان فیدان بۆ بەغدا، لەگەڵ هاوتا عێراقییەکەی فواد حوسێن و بە ئامادەبوونی سەرۆکوەزیرانی عێراق محەمەد شیاع سوودانی واژوو کرا.
نوسەر