ڕاوێژکاری دارایی سەرۆک وەزیرانی عێراق ڕایگەیاند سیاسەتی دارایی ئێستای عێراق بەردەوامبوونی مووچە و دەرماڵەکانی چاودێری کۆمەڵایەتی مسۆگەر دەکات، وێڕای دەستنیشانکردنی سێ سەرچاوەی سەرەکی بۆ دابینکردنی بەردەوامیی مووچە و خەرجییە کۆمەڵایەتییەکان.
ئەمڕۆ سێشەممە، مەزهەر محەمەد ساڵح، ڕاوێژکاری دارایی سەرۆک وەزیرانی عێراق ڕایگەیاند، “بەردەوامیی خەرجییەکانی مانگانەی مووچە و کرێ و مووچەی خانەنشینان و چاودێری کۆمەڵایەتی، لە سایەی ئاڵنگارییە ئابوورییەکانی ئێستا و هەڵبەز و دابەزە جیهانییەکان بەهۆی مەترسییە جیۆپۆلیتیکییەکانەوە، کاری لەپێشینەن، لەمەشدا پشت بە سێ سەرچاوەی سەرەکیی داهات دەبەسترێت کە سەقامگیری بژێوی و کۆمەڵایەتی هاووڵاتیان بە شێوەیەکی مانگانە و ڕێکوپێک دەپارێزن.”
ڕوونیشی کردەوە کە سەرچاوەی یەکەم؛ “زیادکردنی داهاتە نانەوتییەکانە، بە جۆرێک کە گواستنەوەی ئەم داهاتانە لە ڕێگەی چڕکردنەوەی شێوازەکانی پارەدانی ئەلیکترۆنییەوە مسۆگەر دەکرێت، ئەمەش سەرچاوە داراییە خودییەکانی دەوڵەت بەهێز دەکات و پشتبەستنی تەواو بە داهاتی نەوت کەمدەکاتەوە.”
مەزهەر ساڵح ئاماژەی بەوەش کرد سەرچاوەی دووەم؛ “فراوانکردنی بنکەی هەناردەکردنی نەوتی خاو و بەرهەمە نەوتییەکانە. ئەم سیاسەتەش بەکارهێنانی کەناڵە تەقلیدییەکانی هەناردەکردن دەگرێتەوە تا ئەو شوێنەی گونجاو بێت، لەوانە گواستنەوەی وشکانی و دەریایی لە ڕێگەی وڵاتانی دراوسێوە، بەپێی نرخە جیهانییەکانی ئێستای نەوت کە بە ڕێژەی نزیکەی 70% بەرزبووەتەوە بەراورد بە ئاستەکانی پێش سەرهەڵدانی ئاڵۆزییەکان لە ناوچەی کەنداو و ڕۆژهەڵاتی ناوەڕاست”.
ئاماژەی بەوەش کرد کە ئەم فراوانبوونە لە هەناردەکردن لە سایەی نرخە بەرزەکاندا، یارمەتیدەرە بۆ بەهێزکردنی ئەو داهاتانەی کە پێویستن بۆ دابینکردنی خەرجییە کۆمەڵایەتییەکان و مسۆگەرکردنی سەقامگیری بازاڕی ناوخۆ.
دەربارەی سەرچاوەی سێیەمی داهاتیش، ڕاوێژکارە داراییەکەی سەرۆک وەزیرانی عێراق ڕایگەیاند، “پەیڕەوکردنی شێوازێکە لە سیاسەتەکانی ئاسانکاریی چەندایەتی دیاریکراو، ئەویش لە ڕێگەی هەماهەنگیی نەختینەیی و داراییەوە. تێیدا هەماهەنگی نێوان سیاسەتی نەختینەیی و سیاسەتی دارایی چڕ دەکرێتەوە، کە بە یەدەگی دراوی بیانیی کارا پشتگیری دەکرێت، بۆ مسۆگەرکردنی سەقامگیری ئابووری نیشتمانی و بەردەوامیی خەرجییە کۆمەڵایەتییە گشتییەکان، بە شێوەیەک کە پێدانی مووچە و دەرماڵەکانی چاودێری کۆمەڵایەتی بەبێ هیچ وەستانێک بەردەوام بێت.”
مەزهەر ساڵح وتیشی: “بەردەوامیی ئەم سیاسەتە تەواوکارییانە، پاراستنی داهاتی مانگانەی فەرمانبەران گەرەنتی دەکات و سەقامگیری ئابووری و کۆمەڵایەتی لە وڵاتدا بەهێز دەکات، ئەمەش وا دەکات عێراق بتوانێت بە کارایی و کاریگەرییەوە ڕووبەڕووی شۆکە دارایی و ئابوورییە جیهانییەکان ببێتەوە”.