“ژمارەی کوژراوانی خۆپیشاندانەکانی ئێران بەرزبووەتەوە بۆ ٥٣٨ کەس”

خۆپیشاندانەکانی ئێران بەردەوامن و ژمارەی کوژراوانیش بۆ زیاتر لە ٥٣٨ کەس بەرزبووەوە.

ئەمڕۆ دووشەممە، ئاژانسی ھەواڵی چالاکانی مافی مرۆڤی ئێران (ھرانا) بڵاویکردەوە، ژمارەی ئەو کەسانەی کە تا ئێستا لە خۆپیشاندانەکانی ئێراندا کە بە ھۆی دەربڕینی ناڕەزایەتییان دژ بە دۆخی ئابووری وڵاتەکە ڕژاونەتەوە سەر شەقامەکان کوژراون، بەرزبووەتەوە بۆ ٥٣٨ کەس.

ئاژانسەکە لە ڕاپۆرتێکدا ئاماژەی بەوەداوە، خۆپیشاندانەکانی ئێران کە ماوەی دوو ھەفتەیە بەردەوامن، ٣١ پارێزگای ئەو وڵاتەی گرتووەتەوە و ٤٨ ئەندامی هێزە ئەمنییەکانیش کوژراون.

جەخت لەوەش کراوەتەوە کە ھەر لە خۆپیشاندانەکانی ئێراندا تا ئێستا، ١٠ ھەزار و ٦٠٠ خۆپیشاندەر دەستگیر کراون.

تا ئێستا بەرپرسانی ئێران، ھیچ ئامارێکیان لەبارەی ژمارەی قوربانیان لە خۆپیشاندانەکاندا، بڵاو نەکردووەتەوە.

ڕۆژی شەممەی ڕابردوو ئاژانسی ھەواڵی چالاکانی مافی مرۆڤی ئێران کە ناوەندەکەیان لە شاری ڤێرجینیای ئەمریکایە، ڕایانگەیاندبوو لە خۆپیشاندانەکانی ئێراندا تا ئێستا، ٦٦ کەس کوژراون.

لە ٢٨ی کانوونی یەکەمەوە، شەپۆلێکی خۆپیشاندان بە نیشانەی ناڕەزایەتی دژ بە خراپی دۆخی ئابووری و لەدەستدانی بەھای دراوی ئێرانی، لەو وڵاتە سەری ھەڵداوە و زۆربەی شارەکانی گرتووەتەوە کە تا ئێستا بەردەوامە.