محەمەد زەبار
دوای ساڵێک و دوو مانگ لە هەڵبژاردنی پەرلەمانی کوردستان، نە پارتی و نە مەسرور بارزانی بەلایانەوە گرنگ نییە کابینەی ١٠ پێکدێت یاخوود نا، چونکە تا ئێستاشی لەسەر بێت خۆی هەر سەرۆکی حکومەتە و ئەگەر کابینەی نوێش پێکبێت هەر خۆی سەرۆکی حکومەت دەبێت و درێژەپێدەری ئەم کابینەیە دەبێت، بەکوردیەکەی هەمان تاس و حەمام!
دامەزراوەی تەشریعی کە هاوکات چاودێرە بەسەر حکومەتدا، سێ ساڵە لە هەرێم بوونی نەماوە. بەناو سەرۆکی حکومەتیش خۆی لە هیچ کەموکوڕییەک بە بەرپرسیار نازانێت. بە پێچەوانەوە کارە باشەکان بۆ خۆی دەبات و ئۆباڵی خراپەکانیش دەخاتە ئەستۆی خەڵکەوە!
لەم چەند رۆژەی رابردووشدا، پارتی و یەکێتی هاوشێوەی سەردەمی دوو ئیدارەیی بەجیا رێگرییان لە دوو بەرپرسی باڵای حزبەکانیان کرد، یەکێتی بچێتە هەولێر و پارتیش بێتە سلێمانی، لەم نێوەندەشدا بۆنی دوو ئیدارەیی و شەڕی ناوخۆ دووبارە باڵی کێشاوەتەوە بەسەر ئەم هەرێمە ٣ پارێزگاییەدا! وەک چۆن لە ٩٦ پارتی بەشێک لە پەرلەمانتارەکانی یەکێتی کڕی و لە لە پەرلەمان بە ٥٠+١ حکومەتی پێکهێنا، دواتریش یەکێتی لە سلێمانی جەلال تاڵەبانی کرد بە سەرۆکی هەرێم و ئیدارەی سەوزی راگەیاند، دووبارە پارتی هەڕەشەی پێکهێنانی حکومەتێک دەکات بێ یەکێتی، ئەمەشیان چەندین جار بەرپرسانی یەکێتی هەرەشەیان لە پارتی کردووە ( بەتایبەت مەسەلەی غازەکەی چەمچەماڵ کە نەک هەر دەیگرنەوە بەڵکوو دەشی تەقێننەوە!).
ئەوەی لەم نێوەندەدا زەرەمەندی یەکەمە نە پارتییە نە یەکێتی، بەڵکوو خەڵکی کوردستان و قەوارەی هەرێمە، چونکە بە نەبوونی حکومەتێکی شەرعی و موئەسەساتی وەک پەرلەمان و دامەزراوەکان، سەر دەکێشێت بۆ دوو ئیدارەیی و شەڕی ناوخۆ! لەم حاڵەتەشدا هیچ هێزێکی ئیقلیمی و جیهانیی بە حکومەتی عێراقیشەوە، ئامادە نییە دان بنێت بە هیچ کام لە ئیدارەکانی زۆنی سەوز و زەرد! بۆ پڕکردنەوەی ئەو بۆشاییەش بە دڵنیاییەوە عێراق پاڵێوراوی سەرەکییە! ئیتر با بزانین، پارتی و یەکێتی لەبەر خاتری پۆست و پارەی خۆیان، ئامادەن ئەو قومارە بە چارەنووسی میللەتی کوردەوە بکەن!؟ هەرچەندە ئەگەر بشیکەن زۆر جێی سەرسوڕمان نییە! چونکە پێشتریش کردوویانە!
نوسەر