ئەندامێكی لیژنەی نەوت و غاز لە پەرلەمانی عێراق، هەرێمی كوردستان بە “كوڕێكی یاخی” وەسف دەكات و ڕایدەگەیەنێت، هۆكاری بە قاچاخ بردنی نەوت كۆنتڕۆڵ نەكردنی دەروازە سنورییەكانە لەلایەن بەغداوە.
عەلی مەشكور، ئەندامی لیژنەی نەوت و غاز لە پەرلەمانی عێراق لە چاوپێکەوتنێکدا لەگەڵ کەناڵی (العهد) دەڵێت: هەرێمی کوردستان کوڕێکی یاخییە و بەغدا نازانێت مامەڵەی لەگەڵ بكات.
ڕاشیگەیاندووە، هۆكاری بە قاچاخ بردنی نەوتیش دەگێڕێتەوە بۆ ئەوەی دەروازەكانی لەلایەن بەغداوە كۆنتڕۆڵ نەكراون، كە ژمارەی دەروازە نافەرمییەكانی گەیشتووەتە (26) دەروازە.
دەشڵێت: هەندێک لە هێزە سیاسیەكان رێگری لە چەسپاندنی پەیوەندییەکانی نێوان بەغدا و هەولێر دەکەن، دەیانەوێت بە یەكجار هەموو شتێك بەدەستبهێنن، ئەمە كارێكی هەڵەیە، ئەگەر بەغدا لە قۆناغی یەكەمیشدا نیوەی نەوتەكە بەدەستبهێنێت، باشترە لەوەی هەمووی بە قاچاخ ببرێت.
ئاماژەی بەوەشکردووە، نوێنەری هەولێر لە گفتوگۆکان بەهێزترە لە دانوستانکارەكانی بەغدا، بۆیە دەبێت کاربکرێت بۆ گۆڕینی ستراتیژی دانوستان لەگەڵ هەولێر.
لەبارەی یاسای نەوت و غاز وتی، “ناکۆکییە سیاسییەکان وایکردووە پەسەندکردنی یاسای نەوت و غاز دوابخرێت، بۆیە بە دەرکردنی ئەو یاسایە ناکۆکییەکانی نێوان بەغدا و هەولێر یەکلایی دەبێتەوە”.