پاش چەند ساڵێک لە هاوسەرگیری، کاتێک گەرمیی سەرەتاکان کەم دەبێتەوە و درەوشانەوەی وردەکارییە یەکەمینەکان نامێنن، زۆرێک لە هاوسەران بە دەنگێکی نزمەوە دەست دەکەن بە پرسیارکردن “ئایا خۆشەویستی سارد بووەتەوە؟ یاخود تەنیا ماندوو بووین؟”
ئەو مەودا شاراوەیەی نێوان بێزاری و ساردبوونەوە ژیانی هاوسەرگیری دەخاتە تاقیکردنەوەیەکی سەختەوە، چونکە هەستەکان لە پەرۆشییەکی سۆزدارییەوە دەگۆڕێن بۆ ڕاهاتنێکی ڕۆژانە کە بەرپرسیارییەکان، گوشاری کات و دووبارەبوونەوەی ڕۆتین باڵی بەسەردا کێشاوە.
بەڵام بێزاری ڕاگەیاندنی کۆتایی هاتنی خۆشەویستی نییە، بەڵکو هێمایەکی ئاگادارکردنەوەی ژیرانەیە، کە بە هاوسەرەکان دەڵێت کاتی ئەوە هاتووە دووبارە ڕیتمەکە ڕێکبخرێتەوە و پەیوەندییەکە نوێ بکرێتەوە.
شیرین عەبدولعەلیم، پسپۆڕی دەروونی، ڕوونی دەکاتەوە کە هەستکردن بە بێزاری شتێکی سروشتییە و ناتوانرێت بە تەواوی لێی دوور کەوینەوە. چونکە “قورسە مرۆڤ لە شتە دووبارەبووەکان بێزار نەبێت. پاش چەند ساڵێک لە هاوسەرگیری، ژیان پڕ دەبێت لە وردەکاریی ڕۆژانەی ساردوسڕ، تەنانەت تایبەتترین ساتەکانیش دووبارە دەبنەوە، ئەمەش وادەکات هەستی بێزاری پرسێکی مرۆیی ڕەها بێت و بە مەرج نازانرێت کە خۆشەویستی لە دەست چووبێت.”
شیرین دەشڵێت “هەستەکان سروشتی خۆیان گۆڕاون، ئەوەی ئەمڕۆ خۆشمان دەوێت، ڕەنگە سبەی کاڵ ببێتەوە، بەڵام هاوسەرگیری تەنیا لەسەر هەستەکان بنیات نانرێت، بەڵکو لەسەر خۆشەویستی و سۆزە، کە هەردووکیان ڕەفتارێکن و لە کردارەکانی ڕۆژانەدا دەردەکەون: قسەیەکی خۆش، دیارییەکی سادە، بەشداریکردن لە بەرپرسیارییەکان، یان تەنیا گرنگیدانێکی ڕاستگۆیانە بە کەسی بەرامبەر.”
حاڵەتی ساردبوونەوەی نێوان هاوسەرەکان، کاریگەری لەسەر کەشوهەوای خێزانەکە بە گشتی هەیە، چونکە منداڵان بە ئاسانی نیشانەکانی گرژی یان بێباکییەکە هەڵدەگرنەوە. عەبدولعەلیم دەڵێت “منداڵ لە ڕووی دەروونییەوە تەندروست پەروەردە دەبێت کاتێک هەست دەکات دایک و باوکی لێک حاڵی دەبن و بەیەکەوە بەستراونەتەوە، چونکە جێگیریی پەیوەندیی هاوسەرگیری یەکەم شتە کە هەستی ئارامی بە منداڵ دەبەخشێت.”
شیرین حاڵەتی بێدەنگیی هاوسەرگیری یان ئەوەی پێی دەوترێت هاوسەرگیریی بێدەنگ، بە “شەڕێکی حەتمی” وەسف دەکات، کە دوای چەندین ساڵ پێکەوەژیان، بەرپرسیارییە زۆرەکان و ڕۆتین و بێزاری، بابەتەکانی نێوانیان دووبارە دەبنەوە تا دەگەنە ئەوەی کە هەریەکەیان وەڵامدانەوەی لایەنی بەرامبەر دەزانێت.
شیرین دووپاتی دەکاتەوە کە “سەرکێشەکە لە دەستی پیاوە، چونکە ژن هەمیشە ئامادەی قسەکردنە لەگەڵ هاوسەرەکەی، بۆیە دەبێت پیاو پێشنیار بکات و کاتێک تەرخان بکات کە ئەندامانی خێزانەکەی کۆ بکاتەوە بۆ ئاڵوگۆڕی گفتوگۆ و گوێگرتن لێیان.”
لەلایەکی دیکەوە، شیرین ئامۆژگارییەک ئاراستەی ژنان دەکات “ئەم چەند خولەکە مەکە بە قسەکردن لەسەر بەرپرسیارییەکان، کێشەکان و خستنەڕووی سکاڵاکان، چونکە ئەمە پیاوەکە دوور دەخاتەوە و وا دەکات جارێکی تر دەستپێشخەریی قسەکردن نەکات.”
لە پەیوەندییە هاوسەرگیرییەکاندا، وردەکارییە بچووکەکان گۆڕانکاری دروست دەکەن. سوپرایزە سادەکان، وەک نامەیەکی چاوەڕواننەکراو یان دیارییەک، دەتوانن ژیان بۆ پەیوەندییەکە بگەڕێننەوە. شیرین دەڵێت”خودا دروستی کردووین لەسەر خۆشویستنی کەسێک کە هەوڵمان بۆ بدات، پیاو کلیلی چوونە ژوورەوەی گرنگیدان و چاودێرییە، و ژنیش کلیلی چوونە ژوورەوەی قسەی خۆشە. بۆیە، دەبێت هەریەکەیان کلیلی دڵی ئەوی تر بزانێت بۆ بەدەستهێنانی خۆشەویستییەکەی.”
هەنگاوە بچووکەکان گۆڕانکاریی گەورە دروست دەکەن:
بۆ کەمکردنەوەی هەستی بێزاری لە پەیوەندییە سۆزدارییەکاندا، شارەزایان چەند هەنگاوێکی کرداری سادەیان خستووەتە ڕوو کە دەتوانێت گەرمی و هاوسەنگی بۆ پەیوەندییەکە بگەڕێنێتەوە:
خۆشەویستی نوێ دەبێتەوە و دووبارە نابێتەوە:
بێزاری لە هاوسەرگیریدا بەو واتایە نییە کە خۆشەویستی کۆتایی هاتووە، بەڵکو داوای زمانێکی نوێ دەکات، زمانێک کە تێیدا کردارەکان زیاتر لە وشەکان قسەیان تێدا بکرێت، و سوپرایز لە شوێنی دووبارەبوونەوە بچێنرێت، و بۆشایی بۆ بێدەنگی بمێنێتەوە تاکو هەریەکەیان بیری دەنگی ئەوی تری بکات.
Leave a Reply