فەرماندەی گشتیی هێزە چەکدارەکان محەمەد شیاع سودانی، ئاڕاستەی دەزگا ئەمنییەکان دەکات بۆ بەرەنگاربوونەوە و ڕووبەڕووبوونەوەی هەر کارێک کە زیان بە ئاسایش و سەقامگیری بگەیەنێت، لەژێر ڕۆشنایی پەرەسەندنەکانی ناوچەکەدا.
ئەمڕۆ دووشەممە، سەرۆک وەزیران و فەرماندەی گشتیی هێزە چەکدارەکان، محەمەد شیاع سودانی، سەرپەرشتی کۆبوونەوەیەکی نائاسایی “ئەنجومەنی وزاری بۆ ئاسایشی نیشتمانی” کرد. تێیدا تاوتێی بارودۆخی گشتی وڵات و پەرەسەندنی ڕووداوەکان و گرژییە ئەمنییە مەترسیدارەکانی ناوچەکە کرا.
گرنگترین بڕیار و جەختکردنەوەکان:
پاراستنی سەقامگیری: فەرماندەی گشتی فەرمانی نوێی دەرکرد بۆ دەزگا ئەمنییەکان تا ڕووبەڕووی هەر کارێک ببنەوە کە ئاسایشی وڵات تێکدەدات. هەروەها ڕێگری بکرێت لە هەر لایەنێک کە بیەوێت عێراق تێوەگلێنێت لە ململانێیە بەردەوامەکاندا.
ئەرکی دەوڵەت و مافی هاووڵاتی: ئەنجومەن جەختی کردەوە کە دەوڵەت مافی ڕادەربڕین و گردبوونەوەی ئاشتییانە بەپێی دەستوور دەپارێزێت، بەڵام لە هەمان کاتدا حکومەت پابەندە بە پاراستنی نێردە دیپلۆماسییەکان و بنکە گرنگەکان و ڕێگە نادات هیچ هێرشێکیان بکرێتە سەر.
سەروەری بڕیار: جەختکرایەوە کە بڕیاری ئاسایشی نیشتمانی، ئاشتی و جووڵە سەربازییەکان، تەنها و تەنها لەژێر دەسەڵاتی دەوڵەت و دامەزراوە دەستوورییەکاندایە. عێراق ڕێگە نادات خاکەکەی بۆ هیچ ململانێیەکی دەرەکی یان ناوخۆیی بەکاربهێنرێت.
ئاسایشی ئابووری و خۆراک: لە کۆبوونەوەکەدا باس لە مەترسییە ئابوورییەکانی ئەگەری فراوانبوونی شەڕ کرا. وەزیرانی نەوت و بازرگانی ئامادە بوون و ڕاپۆرتێکیان لەسەر دۆخی سووتەمەنی، وزە و ئاسایشی خۆراک پێشکەش کرد بۆ گرتنەبەری ڕێوشوێنی پێویست لە ئەگەری هەر پەرەسەندنێکی نوێ لە ناوچەکە و جیهان.