سامان ئیسماعیل
ئەگەر گەشتیارێک یان توێژەرێک بێتە هەرێمی کوردستان و بەدوای جێهێڵراوترین، بێدەنگترین، و وێرانترین بینادا بگەڕێت، پێویست ناکات بچێتە دەرەوەی شارەکان بۆ بینینی کارگەیەکی داخراو یان پڕۆژەیەکی تەواونەکراو، بەڵکو تەنیا پێویستە سەردانی بینایەکی زەبەلاح و کەشخە بکات لە دڵی پایتەختدا کە پێی دەوترێت “پەرلەمانی کوردستان”! لە ڕووی فیزیکییەوە، ئەم بینایە زۆر باش وەستاوە؛ پاسەوانی هەیە، کارەبای بۆ دابین کراوە، و باغچەکەی ئاو دەدرێت. لە ڕووی تیۆریشەوە هەموو شتێک تەواوە؛ هەڵبژاردن کرا، نوێنەرەکان دیاری کران، و سوێندی یاساییشیان خوارد. بەڵام لە ڕووی سیاسی، کاریگەری، و نوێنەرایەتیکردنی خەڵکەوە، ئەم بینایە هێندە جێهێڵراو و چۆڵە، کە تەنانەت دەنگی هەنگاوەکانیش تێیدا دەنگدانەوەیەکی خەمناکیان هەیە، وەک ئەوەی قەبرستانێکی گەورە بێت بۆ ناشتنی خەون و داواکارییەکانی میللەتێک.
ئەمە لوتکەی سووکایەتییە بە دیموکراسی کاتێک دەبینین ئەو دەزگایەی کە بڕیار بوو ببێتە دڵی لێدەری وڵات و چاودێر بەسەر دەسەڵاتەوە، ئێستا بووەتە تەنیا هۆڵێکی چاوەڕوانیی بێزارکەر بۆ ئەو پەرلەمانتارانەی کە تەنیا ئەرکیان ئەوەیە گوێڕایەڵی مەرجەکانی مەکتەب سیاسیی حزبەکانیان بن. کاتێک هاوڵاتییەکی ماندوو داوای چارەسەری قەیرانی مووچە، بێکارەبایی، یان گرانبوونی نرخی بەنزین دەکات، ئەندامانی پەرلەمان لەبری ئەوەی وەزیرەکان بانگهێشت بکەن و لێپرسینەوەیان لێ بکەن، تەنیا لەسەر کورسییە نەرمەکانیان دادەنیشن و چاوەڕێ دەکەن بزانن کەی حزبەکانیان لە پشتی پەردەوە ڕێکدەکەون بۆ ئەوەی ئەمانیش چەپڵەی بۆ لێبدەن! نوخبەی سیاسی زۆر وەستایانە توانیویانە ئەم دامەزراوەیە لە ناوەڕۆکە ڕاستەقینەکەی خاڵی بکەنەوە، بە جۆرێک کە ئێستا خەڵک وەها سەیری پەرلەمان دەکات وەک ئەوەی مۆزەخانەیەک بێت کە تەنیا بۆ وێنەگرتن و پەخشکردنی کۆنگرەی ڕۆژنامەوانیی بێمانا بەکاردێت. لە کۆتاییدا، دەبێت دان بەو ڕاستییە تاڵەدا بنێین کە پەرلەمانی کوردستان چیتر دەزگایەکی یاسادانان نییە، بەڵکو بە فەرمی بووەتە “گرانبەهاترین دیکۆرات و کەرەستەی جوانکاری” لەم هەرێمەدا، کە تێچووەکەی ملیارەها دینارە، بەڵام سوودەکەی بۆ هاوڵاتییان سفرێکی ڕەهایە!
Leave a Reply