سەرۆك كۆمار و سەرۆك وەزیرانی عێراق دەربارەی دۆخی عێراق كۆبوونەوە و جەخت لە گرنگی جێبەجێکردنی شایستە دەستوورییەکان کرایەوە.
نووسینگەی ڕاگەیاندنی سەرۆکی ئەنجوومەنی وەزیرانی عێراق بڵاویكردەوە، محەمەد شەیاع سودانی، ئەمڕۆ دوو شەممە، پێشوازی کرد لە سەرۆک کۆمار عەبدوللەتیف جەمال ڕەشید و لە دیدارەکەدا باس لە دوایین پێشهاتەکانی وڵات و ناوچەکە کرا و جەخت لەسەر پێویستی پتەوکردنی یەکڕیزی نیشتمانی و پاڵپشتیکردنی ڕێوشوێن و هەنگاوەکانی حکومەت کرایەوە بۆ بەهێزکردنی ڕۆڵی سەرەکی عێراق لە ناوچەکەدا.
بەپێی ڕاگەیەنراوەكە، جەتکرایەوە لەسەر پابەندبوونی حکومەت بە سیاسەتی هاوسەنگ لە پەیوەندییەکانی دەرەوە و هەڵوێستی پاڵپشتیکراو بۆ وتوێژ لە چارەسەرکردنی قەیرانەکان و چەسپاندنی ئاسایش و سەقامگیری ناوچەیی.
لە بەشێکی تری دیدارەکەدا جەخت لە گرنگی جێبەجێکردنی شایستە دەستوورییەکان کرایەوە، بۆ پێکهێنانی حکومەتێک کە توانای درێژەدانی بە پڕۆسەی گەشەپێدان و بوژانەوەی ئابووری هەبێت و لە قۆناغی داهاتوودا خواستەکانی گەلی عێراق بەدی بهێنێت.