وەزارەتی دارایی و ئابووری هەرێمی کوردستان ڕێنمایی تایبەت بە زیادکردنی مووچەی خانەنشینی کرێکاران بۆ 500 هەزار دینار بڵاوکردەوە و ڕایگەیاند، ڕێنماییەکە لە ڕۆژی دەرچوونیەوە جێبەجێ دەکرێت.
دەقی رێنماییەکە:
پاڵپشت بە بڕیاری ئەنجومەنی وەزیران ژمارە (٢٩٧) لە ڕێکەوتی ٢٠٢٦/٦/٢٤ بە نووسراویان ژمارە (٩٠٠٧) لە (٢٠٢٦/٧/٢٧)، بەرگەی (دووەم)ی کۆنووسی لیژنەی دەرکردن و پێداچوونەوە بە ڕێنماییە داراییەکان ژمارە (١٦٧) لە ٢٠٢٦/٩/٦ بڕیاردرا بە:
یەکەم: کەمترین مووچەی مانگانەی خانەنشینی بۆ کرێکارانی کەرتی تایبەت بە بڕی (٥٠٠,٠٠٠) پێنج سەد هەزار دیناری عێراقی دیاری دەکرێت.
دووەم: بەپێی یاسای خانەنشینی و دەستەبەری کۆمەڵایەتی کرێکاران ژمارە (٣٩)ی ساڵی /١٩٧١ی هەمووراکراو، و یاسای ژمارە (٤)ی ساڵی/٢٠١٢ (یاسای پیادەکردنی یاسای خانەنشینی و دەستەبەری کۆمەڵایەتی کرێکاران)، ئەوانەی شایستەی مووچەی هەتووی بەرگەی (یەکەم)ی سەرەوە دەبن ئەمانەن:
١_ خانەنشینی بەپێی تەمەن و خزمەت:
أ_ ئەگەر پیاو تەمەنی (٦٠) شەست ساڵی تەواو کردبێت، یاخود ئافرەت تەمەنی (٥٥) پێنجا و پێنج ساڵی تەواو کردبێت، و لانی کەم (٢٠) بیست ساڵ خزمەتی دەستەبەرکراویان هەبێت.
ب_ ئەگەر پیاو لانی کەم (٣٠) سی ساڵ خزمەتی دەستەبەرکراوی هەبێت، یاخود ئافرەت (٢٥) بیست و پێنج ساڵ خزمەتی دەستەبەرکراوی هەبێت.
٢_ نەخۆشی پیشەیی: ئەو کرێکارانەی تووشی نەخۆشی پیشەیی دەبن بە ڕێژەی (١٠٠٪) بەپێی ڕاپۆرتی لیژنەی پزیشکی.
٣_ پێکانی کار: ئەگەر کرێکار تووشی پێکانی کار بوو وە بووە هۆی پەککەوتەی تەواو یاخود مردنی بەپێی ڕاپۆرتی لیژنەی پزیشکی.
٤_ کۆچی دوایی کرێکار: ئەگەر لە ماوەی خزمەتی دەستەبەرکراویدا کرێکارەکە کۆچی دوایی کرد و ناوی لە تۆمارەکانی دەستەبەری کۆمەڵایەتی بەردەوام بوو، جێماوەکانی شایستەی مووچەی خانەنشینی تەواو دەبن.
سێیەم: ئەم ڕێنماییە لە ڕۆژی دەرچوونیەوە جێبەجێ دەکرێت و لە ڕۆژنامەی فەرمی (وەقایعی کوردستان) بڵاودەکرێتەوە.
ئاوات جەناب نوری
وەزیری دارایی و ئابووری
Leave a Reply