دەزگای ئاسایش ڕایگەیاند بە درۆن هێرش کراوەتە سەر کەمپی پەنابەران لە سوورداشی سنووری شارۆچکەی دووکان بێ ئەوەی زیانی گیانی لێ بکەوێتەوە.
دەزگای ئاسایشی هەرێم ڕایگەیاند، کاتژمێر 4:45 بۆ 5:05 خولەکی بەرەبەیانی ئەمڕۆ دووشەممە، بە سێ درۆن هێرش کرایە سەر کەمپی پەنابەران لە سوورداش و هیچ زیانێکی گیانی لێ نەکەوتووەتەوە.
پێشتر عەلی رەنجبەری، بەرپرسی پەیوەندییەکانی کۆمەڵە رایگەیاندبوو، کاتژمێر 4:40 خولەکی بەرەبەیانی ئەمڕۆ دووشەممە، بە درۆن هێرش کراوەتە سەر کەمپی سوورداش و “بەخۆشحاڵییەوە هیچ زیانێکی گیانی نەبووە و بنەماڵە و هاوڕێیانمان سەلامەتن، بەڵام زیانی مادی هەن”.
جەختیشی کردەوە کە جگه لە ژن و منداڵ و خەڵکی مەدەنی، هیچ بنکەیەکی سەربازی و حیزبی لەو شوێنەدا بوونی نییە کە کراوەتە ئامانج.
لای خۆشیەوە ئەمجەد حوسێن پەناهی، ئەندامی سەرکردایەتیی کۆمەڵەی زەحمەتکێشانی کوردستان ڕایگەیاند، بەهۆی هێرشەکەوە، ژمارەیەک بارەگا و خانوو سووتاون.
ڕوونیشیکردەوە کە لە دەستپێکی شەڕی نێوان ئێران و ئەمریکاوە تاوەکو ئێستا، بە 108 مووشەک و درۆن بارەگا و کەمپەکانیان کراونەتە ئامانج.
Leave a Reply