محمد قادر حسن
دەنگدان دەبێتە پەرلەمان، پەرلەمان دەبێتە حکومەت، حکومەت ڕووبەڕووی لێپرسینەوە دەبێتەوە، و لە کۆتاییدا خزمەتگوزاری بۆ هاوڵاتییان بەرهەم دێت.
لە هەرێمی کوردستاندا ئەم زنجیرە دامەزراوەییە لە قۆناغێکی زۆر هەستیاردا پچڕاوە. هاوڵاتی بەشداریی لە پڕۆسەکەدا کرد، هەڵبژاردن بەڕێوەچوو، کورسییەکان دیاری کران، و پەرلەمانتارە نوێیەکان لە هۆڵەکەدا کۆبوونەوە. سەرەڕای تەواوبوونی ئەم هەنگاوانە، زنجیرەکە لە جووڵە کەوت؛ چونکە دانیشتنی یەکەم نەیتوانی دەستەی سەرۆکایەتی هەڵبژێرێت و ڕێڕەوی پێکهێنانی کابینەی نوێش بە تەواوی پەکی کەوت. لێرەدا پرسیارە گەورە و فەلسەفییەکە سەرهەڵدەدات: کاتێک دەنگی هاوڵاتی نەتوانێت پەرلەمانێکی کارا و حکومەتێکی شەرعی بەرهەم بهێنێت، سیستەمی سیاسی بە دیاریکراوی داوا لە خەڵک دەکات بەشداری لە چ پرۆسەیەکدا بکەن؟
لە ڕوانگەیەکی سەرپێییەوە، ڕەنگە وابێت کە سیستەمە نوێیەکە زۆر لەوە سادەتر بێت کە بیری لێدەکەینەوە: «هاوڵاتییان دەنگ دەدەن، سیاسەتمەدارەکان دەست بە دانوستانی بێکۆتایی دەکەن، پەرلەمان چاوەڕێ دەکات، حکومەت چاوەڕێ دەکات، و لە کۆتاییشدا هەمووان پیرۆزبایی سەرکەوتنی دیموکراسی لە یەکتری دەکەن!»
بە تێپەڕاندنی ئەم ڕوانگە تەنزئامێزە، ڕاستییە تاڵەکە ئەوەیە کە دیموکراسی تەنیا چوونە سەر سندووقی دەنگدان و بەسەربردنی چەند کاتژمێرێک لە ڕۆژی هەڵبژاردندا نییە. دیموکراسیی ڕاستەقینە بریتییە لە توانای سیستەمی سیاسی لە وەرگێڕانی دەنگی هاوڵاتییان بۆ دامەزراوەی کارا، خزمەتگوزاریی گشتی، و دەسەڵاتێکی شەرعی کە لەبەردەم یاسادا بەرپرسیار بێت.
Leave a Reply