ئەحمەد خالید
لە هەموو دەوڵەتێکی دامەزراوەییدا، ئەندامبوون لە هێزە ئەمنییەکان، ئاسایش، پۆلیس، یان هەبوونی پلەوپایەی حکومی و حزبی، پێناسەی بەرپرسیارێتییە نەک مۆڵەتی باڵادەستی. بەڵام لە واقیعی هەرێمی کوردستاندا، زۆرجار هەڵگرتنی چەک و پۆشینی جلوبەرگی فەرمی وەک دەسەڵاتێکی ڕەها بەکاردەهێنرێت کە تێیدا هەندێک کەس وا بیر دەکەنەوە پێگەکەیان دەسەڵاتی کۆنتڕۆڵکردن، هەڕەشەکردن، یان تەنانەت سەندنەوەی ژیانی هاوسەر، خوشک، یان کچەکانیان پێ دەبەخشێت. ڕاپۆرتە نێودەوڵەتییەکان و ڕێکخراوەکانی مافی مرۆڤ چەندین جار ئاماژەیان بەوە کردووە کە لە هەندێک یەکەی ئەمنیدا کلتووری دەربازبوون لە سزا هەیە، بە جۆرێک کە ئەنجامدەرانی توندوتیژی دژی ژنان پشت بە پەیوەندییە سەربازی و حزبییەکانیان دەبەستن بۆ دەربازبوون لە دەستی دادگا.
ئەم شێواندنەی چەمکی دەسەڵات مەترسیدارترین شێوازی توندوتیژییە؛ چونکە چەکێک کە بە پارەی گشتی کڕدراوە بۆ پاراستنی هاوڵاتییان، ناوبەناو دەکرێتە ئامرازێک بۆ هەڕەشەکردن و بێدەنگکردنی قوربانی لەناو ماڵدا. کاتێک ژنێک لە ترسی هەژموون و پێگەی ئەمنیی تۆمەتبارەکە تەنانەت نەتوانێت سکاڵا لە بنکەی پۆلیس تۆمار بکات، یان سکاڵاکەی لە ڕێگەی دەستتێوەردانی سەربازییەوە پەردەپۆش بکرێت، سیستەمی دادوەری شکۆی خۆی لەدەست دەدات.
پۆست و پلەی ئەمنی دەبێت بەرپرسیارێتیی کەسەکان دووقات بکاتەوە بەرامبەر یاسا، نەک پارێزبەندییان پێ ببەخشێت بۆ پێشێلکردنی مافی مرۆڤ. هەرچەندە پۆست و پایەی کەسێک بەرزتر بێت، ئەرکی پابەندبوونی بە یاسا گەورەتر و قورستر دەبێت.
Leave a Reply