لە سەرتاسەری کوردستاندا بە نزا و پەرستش و بەخشینەوەی شیرینی یادی لەدایکبوونی پێغەمبەر (دروودی خوای لەسەر بێت) کرایەوە.
ئەمڕۆ پێنجشەممە لە یادی لە دایکبوونی پێغەمبەر محەمەد (دروودی خوای لێ بێت) وەک ھەموو ساڵێک، موسڵمانان دوای نوێژی بەیانی، بە جلوبەرگێکی جوان و بۆنی خۆشەوە سەردانی بازاڕەکانیان کرد و نوقڵ و شیرینیان بەسەر یەکتردا بەخشییەوە.
لە بەیانییەکی زووەوە، ژمارەیەکی زۆر ھاووڵاتییانی شاری ھەولێر بە پۆشینی جلوبەرگی کوردی ناوچەکە، ھەندێکیشیان بە دەف ژەنین و سروودی ستاییشی و دروشمی تایبەت بە لەدایکبوونی پێغەمبەر (دروودی خوای لەسەر بێت)، ڕوویان لە بازاڕ و بە دیارییکراوی چواردەوری قەڵای شاری ھەولێر کرد و بەشدارییان لە ڕێوڕەسمێکی تایبەت بەم یادە کرد.
لە سلێمانیش هاوشێوەی ساڵانی ڕابردوو لە مزگەوتی کاک ئەحمەدی شێخ کە بە مزگەوتی گەورە نسراوە، یادەکە بەرز ڕاگیرا.
لە شارەکانی ڕۆژهەڵاتی کوردستانیش بە بەخشینەوەی شیرینی و خوێندنەوەی مەولود، یادەکە بەرزڕاگیرا.
لە دوێنێ شەویشەوە لە مزگەوتەکانی باکووری کوردستان بە نزا و نوێژ و پەرستش و سروودی ئایینی یادەکە کرایەوە.