لە دوایین چالاکی مەیدانی و میدیایی خۆیدا، ڕێکخراوی داکۆک پەردەی لەسەر دۆخێکی مەترسیدار لادا کە پەیوەندی بە ئازادی ڕادەربڕینی هاوڵاتیانی ئاساییەوە هەیە لە باشووری کوردستان. لەم ڕووداوەدا کە بۆ یادی ڕۆژنامەگەری کوردی ڕێکخرابوو، بابەتێکی هەستیار تاوتوێ کرا ئەویش نەبوونی ئازادی ڕادەربڕین و بڵاوبوونەوەی ترس و تۆقاندنە لە ناو بەکارهێنەرانی سۆشیال میدیا و تۆڕە کۆمەڵایەتییەکاندا. وەک لە پانێڵەکانی چالاکییەکەدا ئاماژەی پێکرا،
دەسەڵاتی کوردی ژینگەیەکی ئەکتیڤی ئەمنی وای دروستکردووە کە هاوڵاتیان لەسەر کۆمێنتێک یان پۆستێکی سادە ڕووبەڕووی دەستگیرکردن دەبنەوە. ئەم بڕگەیەی چالاکییەکە زۆرترین مشتومڕی لەلایەن ئامادەبووانەوە بەدوای خۆیدا هێنا، چونکە ڕاستەوخۆ پەیوەندی بە ژیانی ڕۆژانەی خەڵکەوە هەبوو.
ڕێکخراوی داکۆک لە ڕێگەی ئەم چالاکییەوە ئەوەی سەلماند کە قەیرانی ئازادی تەنها لە نێو دەزگا فەرمییەکانی ڕاگەیاندندا نییە، بەڵکو گەیشتووەتە ناو مۆبایل و ژیانی تایبەتی هەر تاکێکی کورد. لە کۆتایی ئەم ڕاپۆرتەدا هاتووە کە داکۆک ئامانجییەتی لە ڕێگەی بەڕێوەبردنی ئەم جۆرە چالاکییانەوە، کۆمەڵگای نێودەوڵەتی هان بدات بۆ دروستکردنی فشار لەسەر دەسەڵاتداران بۆ کۆتایی هێنان بەم تیرۆرە ئەلیکترۆنی و دەروونییەی کە بەرامبەر بە هاوڵاتیان دەکرێت.
سەرنوسەر