لە ھەنگاوێکی نوێدا بۆ بەھێزکردنی پەیوەندییە ئابووری و بازرگانییەکان لە ئاستی ناوچەییدا، شاری ھەولێر ئامادەی میوانداریی لووتکەیەکی نێودەوڵەتییە کە کۆمەڵێک بازرگان و وەبەرھێنەر لە ھەرێمی کوردستان، تورکیا و ئازەربایجان کۆدەکاتەوە. چاوەڕوان دەکرێت ئەم ڕووداوە ببێتە سەرەتای قۆناغێکی نوێ لە پەرەپێدانی پەیوەندییە ئابوورییەکان و دروستکردنی دەرفەتی تازە بۆ کاری وەبەرھێنان و بازرگانی.
بەپێی زانیارییەکان لووتکەی دۆستایەتی ھەولێر، تورکیا و ئازەربایجان لە چوارچێوەی ھەوڵە بەردەوامەکان بۆ فراوانکردنی پەیوەندییە ئابووری و بازرگانییەکان بەڕێوەدەچێت. ئامانجی سەرەکی ئەم کۆبوونەوەیە بەھێزکردنی ھاوکارییە لە بوارەکانی بازرگانی، لۆجستیک، گواستنەوە و دروستکردنی پەیوەندییە ڕاستەوخۆکان لەنێوان کەرتی تایبەتی ھەر سێ لایەنەکەیە.
ئەوەی بەردەست کەوتووە لە ئێستادا گفتوگۆ لە نێوان لایەنەکان هەیە بۆ دیارییکردنی وادەی لووتکەکە و تێیدا نزیکەی ٣٠٠ کەس لە بازرگانان، وەبەرھێنەران، نوێنەرانی کۆمپانیاکان و بەرپرسانی پەیوەندیدار لە ھەرێمی کوردستان، تورکیا و ئازەربایجان بەشدار دەبن.
ئازەربایجان لە ماوەی ڕابروودا ئارەزووی خۆی بۆ فراوانکردنی پەیوەندییە ئابوورییەکانیان لەگەڵ ھەرێمی کوردستان دەربڕیووە و ڕێکخستنی ئەم لووتکەیەش لەم چوارچێوەیەدایە، ھەروەھا گفتوگۆکان جەخت لەسەر کەرتی بەرھەمھێنان، پیشەسازی و ھاندانی وەبەرھێنانی بیانی دەکەنەوە بە مەبەستی دروستکردنی دەرفەتی نوێی کار.
بەرنامەی لووتکەکە بۆ ماوەی دوو ڕۆژ ڕێکدەخرێت. ڕۆژی یەکەم تایبەت دەبێت بە دانیشتنە بازرگانییەکان، کۆبوونەوەی ھاوبەش و گفتوگۆ لەسەر دەرفەتە نوێیەکانی وەبەرھێنان و بازرگانی، بەڵام لە ڕۆژی دووەمدا شاندەکان سەردانی کارگە و کارخانەکانی ھەولێر، ھەروەھا ھەندێک لە شوێنە مێژوویی و گەشتیارییەکانی شار دەکەن، بۆ ئەوەی لە نزیکەوە ئاشنا بن بە تواناکان و ژینگەی وەبەرھێنانی ھەرێمی کوردستان ببینن.
چاوەڕوان دەکرێت ئەنجامەکانی ئەم کۆبوونەوەیە کاریگەرییەکی ئەرێنی لەسەر بازاڕ، زیادبوونی ئاڵوگۆڕیی بازرگانی و ڕاکێشانی وەبەرھێنانی بیانی ھەبێت.
Leave a Reply